زوجة المطرب “أبو” تطالب الأهالي بمقاطعة ملاهي بـ كايرو فيستيفال

كشفت نهال لهيطة، زوجة المطرب أبو، تفاصيل تعرض نجلهما بكسر في الأنف وارتجاج في المخ بسبب لعبة في ملاهي كايرو فيستيفال، مطالبة جميع الأهالي بمقاطعته حفاظًا على صحة أطفالهم.

وكتبت نهال لهيطة عبر حسابها الشخصي بموقع التواصل الاجتماعي فيس بوك: ابني يوم الجمعة اللي فاتت كان عنده عيد ميلاد واحد صاحبه في مكان اسمه bounce في كايرو فيستيفال سيتي، بعد ما وصّلناه المكان بساعة كلمتني مامت صاحبه وقالتلي إن ابني مناخيره اتكسرت.

وتابعت نهال لهيطة: الحكاية كلها واضحة في الفيديو ده، الشخص اللي واقف بيوجه ابني ده مشرف في المكان والمفروض متدرب وفاهم، وخلا ابني ينط من أعلى نقطة في المكان وزي ما انتوا شايفين ابني سمع كلامه بالظبط ونط ودشدش مناخيره تماما ولسه الموضوع مخلصش هنا!!.

وأضافت لهيطة: بعد الحادثة المفجعة دي لطفل عنده 11 سنة مافيش دكتور موجود في المكان، واضطروا يستعينوا بدكتور من كايرو فيستيفال سيتي، هاشم ابني جاله ارتجاج في المخ وكسر مضعف في مناخيره طبعا، ولمدة 48 ساعة، لفينا بيه على مستشفيات ودكاترة مصر خوفًا ليكون فيه نزيف داخلي، أو أي مضاعفات تانية مش واضحة.

واستكملت زوجة المطرب أبو: يا جماعة مفيش أي حاجة تستاهل إن ولادكم يحصلهم اللي حصل لابني، ولا إن أنتم تشوفوا اللي إحنا شفناه في آخر كام يوم، من فضلكم بلاش تودوا ولادكم bounce، أنتم مش متخيلين كام حد كلمني أنا وجوزي يحكولنا إن أولادهم أو أولاد قرايبهم وصحابهم اتكسروا أو اتصابوا إصابات كبيرة في المكان ده بسبب الإهمال، أحب أشكر كل الناس اللي سألت علينا وساندونا في الظرف اللي إحنا فيه ده وبجد خلوا بالكم على ولادكم.